The shadow puppets.

തിരശ്ശീലക്കപ്പുറത്ത` രണ്ടു നിഴലുകളായിരുന്നു നമ്മൾ.

മങ്ങിയ വെളിച്ചത്തിൽ നാടകമാടിയവർ.

വേനലും വർഷവും സ്പർശിക്കാത്ത,

ഗന്ധമില്ലാത്ത പൂക്കളും,

ശബ്ദമില്ലാത്ത സംഗീതവും നിറഞ്ഞ

ഈ പ്രണയത്തിന്റെ തിരശ്ശീലയിൽ

നമ്മളെന്നേ പരസ്പരം നഷ്ടപ്പെടുത്തിയവർ.

ഇരിപ്പിടങ്ങളൊഴിഞ്ഞു തുടങ്ങി..

ഇനിയീ ചരടുകളഴിഞ്ഞു തീരുംമുൻപെ,

ബാക്കിയാവുന്നത` നിന്റെ യാത്രാമൊഴി..

നെറുകയിൽ ഒരു ചുംബനം കൊണ്ട്;

ഇനി നീയെന്റെ മരണത്തെ അടയാളപ്പെടുത്തുക.

തൂവൽ..

മഴക്കുമുൻപെ തൂവലുകൽ പൊഴിച്ച്‌ പറന്നുപോവുന്ന പക്ഷികളായിരുന്നു ഒരിയ്ക്കല്‍ സ്വപ്നങ്ങളില്‍ നിറയെ. പക്ഷെ അവളുടെ കണ്ണുകൾ നീലയുടെ ജലമൌനങ്ങളായി എന്റെ സ്വപ്നങ്ങളെ പിന്തുടർന്നു, അവയെന്റെ ആകാശങ്ങളിൽ ഒഴുക്കു നഷ്ടപ്പെട്ട ഒരു കടലായുദിച്ചു. പിന്നീട്‌, കടലാവേശിച്ചു തുടങ്ങിയിരുന്ന ഓർമ്മകളുടെ നനഞ്ഞ മണ്ണില്‍ നിന്നാണു ഞാനാ തൂവലുകളൊക്കെയും പെറുക്കിയെടുക്കാന്‍ തുടങ്ങിയത്‌. എല്ലാ തൂവലുകളും ചേര്‍ത്തു വച്ചാലൊരുപക്ഷെ, എന്റെ പക്ഷിയ്ക്കു പറക്കാനൊരു ചിറകു കിട്ടിയേയ്ക്കുമെന്ന് ഞാന്‍ വെറുതേ മോഹിക്കുന്നു...